டைட்டனிற்கு ட்ரான் ஒன்றை அனுப்பவுள்ள நாசா, உயிர்கள் உள்ளதா என்பதற்கான ஒரு தேடல்!

சூரிய குடும்பத்தில் அடுத்த பணியாக, நாசா டைட்டனிற்கு ட்ரான் ஒன்றை அனுப்பவுள்ளது. டைட்டன் என்பது, சனி கோளின் மிகப்பெரிய நிலா என்பது குறிப்பிடத்தக்கது. நாசா இது குறித்து கூறுகையில், அங்கு உயிர்கள் வாழ்வதற்கு ஏதாவது அறிகுறி இருக்கிறதா என்பதை அறிந்து கொள்ளவே இந்த ட்ரானை அனுப்பவுள்ளதாக குறிப்பிட்டுள்ளது.

இந்த திட்டத்திற்கு 'டிராகன்ஃபிளை' என பெயரிட்டுள்ள நாசா நிறுவனம், இதை 2026-ஆம் ஆண்டில் இந்த பணியை செயல்படுத்தவுள்ளது. 2026-ல் விண்ணில் ஏவப்படவுள்ள இந்த ட்ரான் 2034-ஆம் ஆண்டு, டைட்டனை சென்றடையும் என நாசா குறிப்பிட்டுள்ளது. 

பூமியை தவிர்த்து, தன் தரைப்பகுதியில் தண்ணீர் ஆறுகள், குளங்கள் மற்றும் கடல் ஆகியவற்றை கொண்டுள்ளது என கருத்தப்படும் ஒரே கோள் இதுதான். மேலும், இந்த கோளில் மீதேன், ஈதேன் போன்ற ஹைட்ரோ கார்பன்களும் இடம்பெற்றுள்ளது என்பது குறிப்பிடத்தக்கது.

நாசாவின் நிர்வாகி ஜிம் பிரிடென்ஸ்டைன் இது குறித்து கூறுகையில்,"இந்த மர்மமான உலகை பார்வையிடுவது என்பது, இந்த பிரபஞ்சத்தில் உயிர்களின் இருப்பு பற்றி நாம் அறிந்திருப்பதை மாற்றி அமைக்கும்" என கூறியுள்ளார்.

"2.7 ஆண்டுகள் கால அளவு கொண்ட இந்த பணியில், டிராகன்ஃபிளை வேறுபட்டுள்ள சுற்றுச்சூழல், வாழ்வதற்கான தண்ணீர் மற்றும் இயற்கை ஆதாரங்கள், கடந்த 10 ஆயிரம் வருடங்களில் உயிர்களின் இருப்பு பற்றி அனைத்தையும் ஆராயவுள்ளது.", என இந்த திட்டம் குறித்து நாசா கூறியுள்ளது. 

முதலில் "ஷாங்க்ரி-லா" மணலில் தரையிறங்கவுள்ள இந்த ட்ரான், அங்குள்ள சுற்றுச்சூழலை ஆராயவுள்ளது. இங்கு துவங்கும் இந்த ட்ரானின் ஆராய்ச்சி பயணம் செல்க் பள்ளத்தாக்கு வரை தொடரும் என நாசா கூறியுள்ளது. இந்த பணியில் 175 கிலோமீட்டர்கள் தூரம் வரை இந்த ட்ரான் பறக்கும் என நாசா நம்பிக்கை தெரிவித்துள்ளது.

டைட்டனின் வளிமண்டலம் என்பது பூமியை போலவே, அதிகபடியாக நைட்ரோஜென் வாயுவால் நிரப்பப்பட்டுள்ளது. ஆனால், பூமியில் இருப்பதைவிட நான்கு மடங்கு அதிகமான அடர்த்தியை கொண்டுள்ளது. சூரிய குடும்பத்தில், இதுதான் இரண்டாவது மிகப்பெரிய நிலா என்பது குறிப்பிடத்தக்கது. டைட்டன், சூரியனிலிருந்து 1.4 பில்லியன் கிலோமீட்டர் தொலைவில் அமைந்துள்ளது. இதன் மேற்பகுதியில் -179 டிகிரி செல்சியஸ் வெப்பத்தை கொண்டுள்ளது.மேலும், இதன் மேற்பரப்பு அழுத்தம், பூமியை விட 50 சதவிகிதம் அதிகம் என்பது குறிப்பிடத்தக்கது.