இந்தியாவில் 8000 கடைகளில் விற்பனைக்கு வரவுள்ள 'ரியல்மீ 3 Pro': எப்போது?

'ரியல்மீ 3 Pro' இந்தியாவில் கடைகளில் விற்பனையாகும் என அறிவித்துள்ளது, அந்த நிறுவனம். ஓப்போ நிறுவனத்திலிருந்து பிரிந்து வந்த ரியல்மீ நிறுவனம், இன்று இந்தியாவிலுள்ள ஸ்மார்ட்போன் நிறுவனங்களில் சற்று பிரபலமான நிறுவனம். இந்த நிறுவனம், கடந்த ஏப்ரல் 29-ஆம் தேதி அறிமுகப்படுத்திய ஸ்மார்ட்போன்தான் 'ரியல்மீ 3 Pro'. பலரின் எதிர்பார்ப்பை பெற்ற இந்த ஸ்மார்ட்போனை, அன்லைன் தளங்களில் மட்டுமே விற்பனைக்கு வைத்திருந்த ரியல்மீ நிறுவனம், தற்போது கடைகளில் கிடைக்கும் என அறிவித்துள்ளது. இந்த விற்பனை மே 28 துவங்கவுள்ளது.

இந்த நிறுவனத்தின் தகவல்படி, 'ரியல்மீ 3 Pro' இரண்டு வகைகளில் மட்டுமே கடைகளில் விற்பனையாகவுள்ளது. 6GB RAM + 64GB சேமிப்பு அளவு கொண்ட ரியல்மீ 3 Pro 15,999 ரூபாய்க்கும், 6GB RAM + 128GB சேமிப்பு கொண்டு ரியல்மீ 3 Pro 16,999 ரூபாய்க்கும் விற்பனையாகவுள்ளது. சாம்பல் (Carbon Grey), ஊதா (Lightning Purple), மற்றும் நீலம் (Nitro Blue) ஆகிய வண்ணங்களில் வெளியாகவுள்ளது. இந்த ஸ்மார்ட்போனை ரியல்மீயின் கூட்டணி கடைகளில் மே 25 முதல் மே 27 வரை முன்பதிவு செய்துகொள்ளலாம் என அறிவித்துள்ள இந்த நிறுவனம், அப்படி முன்பதிவு செய்பவர்களுக்கு ஒரு வருட நீட்டிப்பு வாரண்டியையும் வழங்கவுள்ளது.

6.3 இன்ச் FHD+ திரையை கொண்ட இந்த ஸ்மார்ட்போன் வாட்டர் ட்ராப் நாட்ச் திரையை கொண்டது. இதன் திரை விகிதம் 19.5:9. ஸ்னேப்ட்ராகன் 710 எஸ் ஓ சி அமைப்பை கொண்டுள்ளது. 16 மெகாபிக்சல் மற்றும் 5 மெகாபிக்சல் அளவிலான இரண்டு பின்புற கேமராக்களை கொண்ட இந்த ஸ்மார்ட்போனில் 25 மெகாபிக்சல் முன்புற கேமரா பொருத்தப்பட்டுள்ளது. இந்த ஸ்மார்ட்போன் 4,045mAh அளவிலான பேட்டரியை கொண்டுள்ளது.