2-வது சேலின் வெற்றியை தொடர்ந்து அடுத்த சேலுக்கு தயாராகும் ரியல்மி3!

நேற்று இரண்டாவது முறையாக சேலில் விற்பனை செய்யப்பட்ட ரியல்மி 3 ஸ்மார்ட்போன் இதுவரை சுமார் 2,10,000 போன்கள் விற்பனை செய்யப்பட்டுள்ளதாக தகவல் வெளியானது.

தனது முதல் சேலில் 1,50,000 போன்களை விற்பனை செய்த நிலையில் இரண்டாவது சேலில் 60,000 போன்கள் விற்பனை செய்யப்பட்டுள்ளது குறிப்பிடத்தக்கது. இரண்டு சேல்களின் வெற்றியை தொடர்ந்து  தனது மூன்றாம் கட்ட விற்பனை சேலை வரும் மார்ச் -19 ஆம் தேதி மதியம் 12 மணிக்கு துவங்கும் என அந்நிறுவனம் சார்பில் தகவல் வெளியானது. மேலும் ஃபிளிப்கார்ட் மற்றும் ரியல்மி.காம் தளங்களில் நடத்த திட்டமிட்டுள்ளதாக தகவல் வெளியாகியுள்ளது.

ரியல்மி 3 விலை இந்தியா:

இந்தியாவில் 3ஜிபி ரேம் மற்றும் 32ஜிபி சேமிப்பு வசதி கொண்ட ரியல்மி 3 மாடல் ரூ.8,999-க்கு விற்பனை செய்யப்பட்டு வருகிறது. இதே வகையின் 4ஜிபி ரேம் மற்றும் 64ஜிபி சேமிப்பு வசதிகொண்ட ஸ்மார்ட்போன் ரூ.10,999-க்கு விற்பனை செய்யப்படுகிறது. 

இதுவரை கருப்பு மற்றும் டைனாமிக் பிளாக் நிறங்கள் மட்டுமே வெளியாகியுள்ள நிலையில் வரும் மார்ச் 26 முதல் ரேடியன்ட் நீல நிறத்தில் வெளியாகவுள்ளது. மேலும் அந்நிறுவனத்தின் சார்பில் வெளியான தகவலின்படி கருப்பு, டைமண்ட் புளூ மற்றும் மஞ்சள் நிறங்களில் போன் கேஸ்கள் வெளியிடப்போவதாக தகவல் வந்துள்ளது.

ரியல்மி 3 அமைப்புகள்:
இரண்டு சிம்கார்ட் வசதி, கலர் ஓஸ் மற்றும் ஆண்ட்ராய்டு பைய் மென்பொருள் என பல முக்கிய அம்சங்களுடன் வெளியாகியுள்ள இந்த ஸ்மார்ட்போன் 6.2 இஞ்ச் ஹெச்டி திரையும் பெற்றுள்ளது. 

மேலும் இந்த ஸ்மார்ட்போன் 2.1 ஆக்டா கோர் மீடியாடெக் ஹூலியோ SoC-யுடன் வெளியாகியுள்ளது. 3 மற்றும் 4 ஜிபி ரேம் கொண்ட இந்த ஸ்மார்ட்போன் தனது பிரமாண்டமான இரண்டு பின்புற கேமராக்களுடன் வெளியாகியுள்ளது. 

13/2 மெகா பிக்சல் சென்சார்கள் உள்ள நிலையில், ஹெச்டிஆர், ஃபேஸ் ஆன்லாக் போன்ற சிறப்பு அம்சங்களும் இதில் இடம்பெற்றுள்ளன. பேட்டரி வசதியை பொருத்தவரை இந்த ஸ்மார்ட்போன் 4,230mAhவுடன் வெளியாகிறது.