ஜான் டெர்னஸ் தலைமையில் ஆப்பிளின் ஃபோல்டபிள் ஐபேட், AI சாதனங்கள் மற்றும் டச்ஸ்கிரீன் மேக்புக் அறிமுகத் திட்டம்

ஆப்பிள் நிறுவனத்தின் சிஇஓ-வாக சுமார் 15 ஆண்டுகள் பணியாற்றிய டிம் குக், சமீபத்தில் தான் நிறுவனத்தின் இயக்குநர்கள் குழுவில் இணையப்போவதாகவும், அதே சமயம் கொள்கை வகுப்பாளர்களுடன் ஆப்பிள் சார்பாக தொடர்ந்து உரையாடுவேன் என்றும் அறிவித்தார். சப்ளை செயின் நிபுணத்துவத்திற்கு பெயர் பெற்ற குக்-கிற்குப் பிறகு, அந்தப் பொறுப்பை ஜான் டெர்னஸ் (John Ternus) ஏற்கிறார். இவர் ஏற்கனவே ஆப்பிளின் தயாரிப்பு பொறியியல் (Product Engineering) துறையை வழிநடத்தியவர். இருப்பினும், பதவி விலகும் சிஇஓ குக், டெர்னஸிடம் ஒரு "வலிமையான தயாரிப்பு வரிசையை" (Strong Pipeline) விட்டுச் செல்வதாகவும், இது ஆப்பிளின் முதல் ஃபோல்டபிள் ஐபோன் உட்பட பல புதிய சாதனங்களை வரும் மாதங்களிலும் ஆண்டுகளிலும் அறிமுகப்படுத்த உதவும் என்றும் கூறப்படுகிறது.

புதிய தயாரிப்பு வகைகளை அறிமுகப்படுத்துவார் ஜான் டெர்னஸ்

ப்ளூம்பெர்க்கின் மார்க் குர்மன் தனது வாராந்திர 'Power On' செய்திமடலில், ஆப்பிளின் புதிய சிஇஓ-வாக டெர்னஸ் பொறுப்பேற்ற இரண்டு வாரங்களுக்குள், நிறுவனம் தனது முதல் புக்-ஸ்டைல் ஃபோல்டபிள் போனை அறிமுகப்படுத்தும் என்று எழுதியுள்ளார். இது ஐபோன் அல்ட்ரா (iPhone Ultra) என்ற பெயரில் சந்தைப்படுத்தப்படலாம். இந்த கைப்பேசி ஐபோன் 18 ப்ரோ வரிசையுடன் வெளியாகும் என எதிர்பார்க்கப்படுகிறது.இந்த ஃபோல்டபிள் போனின் பொறியியல் மற்றும் மேம்பாட்டுப் பணிகளை டெர்னஸ் கவனித்து வந்ததால், ஆப்பிளின் இந்த முதல் புதிய வகை தயாரிப்பை அறிமுகப்படுத்த அவரே சிறந்த நபராகக் கருதப்படுகிறார். அவரது ஹார்டுவேர் இன்ஜினியரிங் பின்னணி, புதிய தயாரிப்பைப் பற்றி நன்கு விளக்க அவருக்கு உதவும்.

எதிர்கால தயாரிப்பு திட்டங்கள்

முதல் ஃபோல்டபிள் ஐபோன் தவிர, டெர்னஸ் தலைமையில் ஆப்பிள் பல புதிய துறைகளில் நுழையத் திட்டமிட்டுள்ளது:

• AI ஸ்மார்ட் ஹோம் சாதனங்கள்: திரையுடன் கூடிய ஹோம்-பாட் (Smart Home Hub), ஒரு புதிய டேப்லெடாப் ரோபோட் மற்றும் ரிங் (Ring), கூகுள் நெஸ்ட் போன்றவற்றுக்குப் போட்டியாக புதிய பாதுகாப்பு சாதனங்கள்.
• AI அணியக்கூடிய சாதனங்கள் (Wearables): கேமராக்கள் பொருத்தப்பட்ட ஆப்பிளின் முதல் ஸ்மார்ட் கிளாஸ்கள், கேமரா வசதி கொண்ட ஏர்போட்கள் மற்றும் AI பெண்டன்ட் (Pendant).
• மற்றவை: அடுத்த ஆண்டின் தொடக்கத்தில் வரவிருக்கும் டச்ஸ்கிரீன் மேக்புக், 2028 மற்றும் 2030-க்கு இடையில் அறிமுகமாகக்கூடிய ஆக்மென்ட்டட் ரியாலிட்டி (AR) கண்ணாடிகள் மற்றும் 20-இன்ச் மடிக்கக்கூடிய திரை கொண்ட ஃபோல்டபிள் ஐபேட்.

இந்த தயாரிப்புகள் அனைத்தும் தற்போது மேம்பாட்டு நிலையில் (Development phase) இருப்பதால், இவை சந்தைக்கு வருவதை உறுதிப்படுத்த இன்னும் சில காலம் காத்திருக்க வேண்டும். வரும் மாதங்களில் இது குறித்த கூடுதல் தகவல்கள் வெளியாகலாம்