எந்த சமையல் எண்ணெய் ஆரோக்கியமானது? புற்றுநோய் நிபுணரின் வழிகாட்டுதல்

சமையல் எண்ணெய் ஒவ்வொரு சமையலறையிலும் தவிர்க்க முடியாத ஒன்றாக உள்ளது. ஆனால், அனைத்து எண்ணெய்களும் ஒரே மாதிரியான ஊட்டச்சத்து நன்மைகளைத் தருவதில்லை. ஹைதராபாத்தைச் சேர்ந்த அறுவை சிகிச்சை புற்றுநோய் நிபுணர் டாக்டர் அர்ஜுன் சங்கரன், சமையல் எண்ணெய்களை அவற்றின் ஊட்டச்சத்து, வெப்பத் தாங்கும் திறன் மற்றும் ஆன்டி-ஆக்ஸிடன்ட் உள்ளடக்கம் ஆகியவற்றின் அடிப்படையில் 10-க்கு மதிப்பெண்களை வழங்கி வகைப்படுத்தியுள்ளார்.

சிறந்த எண்ணெய்கள்: நெய் மற்றும் அவகேடோ எண்ணெய்

டாக்டர் சங்கரனின் பட்டியலில் 'அவகேடோ' எண்ணெய் 10-க்கு 10 பெற்று முதலிடத்தில் உள்ளது. இது அதிக ஆன்டி-ஆக்ஸிடன்ட்களைக் கொண்டிருப்பதால் சமையலுக்கு சிறந்தது. அடுத்தபடியாக, நெய் 9/10 மதிப்பெண் பெற்றுள்ளது. இது அதிக வெப்பத்தைத் தாங்கும் திறன் கொண்டது என்பதால், வதக்குவதற்கும் மிதமான வறுவலுக்கும் மிகவும் சிறந்தது என்று அவர் குறிப்பிட்டுள்ளார்.

கடுகு எண்ணெய் (8/10), செக்கில் ஆட்டிய எள் எண்ணெய் (8.5/10), கடலை எண்ணெய் (8/10), தேங்காய் எண்ணெய் (8/10) மற்றும் ஆலிவ் எண்ணெய் (8/10) ஆகியவை ஆரோக்கியமான மாற்றுகளாகப் பரிந்துரைக்கப்பட்டுள்ளன. இவை இந்திய சமையல் முறைகளுக்கு மிகவும் ஏற்றவை மற்றும் தேவையான கொழுப்பு அமிலங்களையும் ஆன்டி-ஆக்ஸிடன்ட்களையும் கொண்டுள்ளன. குறிப்பாக ஆலிவ் எண்ணெயைப் பொறுத்தவரை, சுத்திகரிக்கப்பட்ட எண்ணெயை வறுக்கவும், எக்ஸ்ட்ரா வர்ஜின் எண்ணெயைச் சாலட்களுக்கும் பயன்படுத்த அறிவுறுத்தப்பட்டுள்ளது.

தவிர்க்க வேண்டியவை: 'பூஜ்யம்' மதிப்பெண் பெற்றவை

சுத்திகரிக்கப்பட்ட சூரியகாந்தி எண்ணெயை (Refined Sunflower Oil) மிகவும் குறைவாகவே பயன்படுத்த வேண்டும் என்று எச்சரித்த அவர், அதற்கு 'பூஜ்யம்' (0/10) மதிப்பெண் வழங்கியுள்ளார். அதேபோல், வனஸ்பதி, டால்டா மற்றும் பனை எண்ணெய் (Palm oil) ஆகியவை மிகவும் ஆரோக்கியமற்றவை என்றும், அவற்றை முற்றிலும் தவிர்க்க வேண்டும் என்றும் அவர் வலியுறுத்தியுள்ளார்.

ஆரோக்கியமான சமையல் முறை

"எல்லா எண்ணெய்களும் சமமானவை அல்ல; சில ஆரோக்கியத்தை ஆதரிக்கின்றன, சில தீங்கு விளைவிக்கின்றன. எண்ணெயைத் தவிர்ப்பது முக்கியமல்ல, சரியான எண்ணெயைச் சரியான முறையில் தேர்ந்தெடுப்பதே ஆரோக்கியத்திற்கான வழி," என்று அவர் தனது சமூக வலைதளப் பதிவில் குறிப்பிட்டுள்ளார். இந்த ஆய்வுகள், நாம் அன்றாடம் பயன்படுத்தும் பொருட்கள் குறித்து விழிப்புணர்வுடன் இருக்க உதவுகின்றன.

குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே வழங்கப்பட்டுள்ளன. உங்கள் உடல்நலம் சார்ந்த மாற்றங்களுக்கு உங்கள் மருத்துவரை அணுகுவது அவசியம்