உடல் எடையைக் குறைக்கணுமா? உங்கள் டயட்டில் சேர்க்க வேண்டிய 6 ஆரோக்கியமான சீலா (Cheela) ரெசிப்பிகள்!

உடல் எடையைக் குறைக்க நினைப்பவர்கள் சந்திக்கும் மிகப்பெரிய சவால், ஆரோக்கியமான அதே சமயம் சுவையான காலை உணவைத் தேர்ந்தெடுப்பதுதான். இந்திய சமையல் முறையில், மிகக் குறைந்த நேரத்தில் செய்யக்கூடிய மற்றும் ஊட்டச்சத்துக்கள் நிறைந்த ஒரு சிறந்த காலை உணவு 'சீலா' (Cheela) எனப்படும் அடை/தோசை வகை ஆகும். இது உடலுக்குத் தேவையான புரதச்சத்தை (Protein) வழங்குவதோடு, நீண்ட நேரத்திற்குப் பசி எடுக்காமலும் தடுக்கிறது. உடல் எடையை ஆரோக்கியமான முறையில் குறைக்க உங்கள் உணவுப் பட்டியலில் சேர்க்க வேண்டிய 6 சிறந்த சீலா ரெசிப்பிகளை இங்கே பார்ப்போம்.

1. பாசிப்பருப்பு சீலா (Moong Dal Cheela)

இந்திய வீடுகளில் மிகவும் பிரபலமானது இந்த பாசிப்பருப்பு சீலா. பாசிப்பருப்பை சில மணிநேரம் ஊறவைத்து, இஞ்சி, பச்சை மிளகாய் சேர்த்து அரைத்து இந்த அடை தயாரிக்கப்படுகிறது. இதில் கொழுப்புச் சத்து மிகக் குறைவு மற்றும் புரதச்சத்து மிகவும் அதிகம். இது தசை வலிமையை மேம்படுத்த உதவுவதோடு, உடல் எடையை விரைவாகக் குறைக்க நினைப்பவர்களுக்கு ஒரு சிறந்த காலை உணவாகும்.

2. கடலை மாவு சீலா (Besan Cheela)

உங்களிடம் போதிய நேரமில்லை என்றால், சட்டென்று செய்யக்கூடியது இந்த பேசன் சீலா. கடலை மாவுடன் பொடியாக நறுக்கிய வெங்காயம், தக்காளி, கொத்தமல்லி மற்றும் மசாலாப் பொருட்களைக் கலந்து இதனை எளிதாகச் செய்யலாம். இதில் உள்ள நார்ச்சத்து (Fiber) மற்றும் புரோட்டீன், இரத்த சர்க்கரை அளவைக் கட்டுக்குள் வைக்க உதவுவதோடு, உடலுக்குத் தேவையான உடனடி ஆற்றலையும் தருகிறது.

3. ஓட்ஸ் சீலா (Oats Cheela)

ஓட்ஸ் ஆரோக்கியமானது தான் என்றாலும், தினமும் கஞ்சியாகவோ அல்லது உப்மாவாகவோ சாப்பிடப் பலருக்கும் பிடிக்காது. அப்படிப்பட்டவர்கள் ஓட்ஸை மிக்ஸியில் பொடி செய்து, அதனுடன் தயிர், காய்கறிகள் சேர்த்து ஓட்ஸ் சீலாவாகச் செய்து சாப்பிடலாம். இதில் உள்ள கரையும் நார்ச்சத்து (Soluble Fiber) இதய ஆரோக்கியத்திற்கு நல்லது மற்றும் தொப்பையைக் குறைக்க பெரிதும் உதவுகிறது.

4. பன்னீர் சீலா (Paneer Cheela)

புரதச்சத்தின் உச்சகட்ட நன்மைகளைப் பெற விரும்புபவர்கள், சாதாரண சீலாவின் நடுவே துருவிய பன்னீரை ஸ்டஃப்பிங் (Staffing) செய்து சாப்பிடலாம். பன்னீரில் உள்ள கால்சியம் மற்றும் ஆரோக்கியமான கொழுப்புகள், எலும்புகளை வலுவாக்குவதுடன், உடலின் வளர்சிதை மாற்றத்தை (Metabolism) அதிகரித்து கலோரிகளை விரைவாக எரிக்க உதவுகிறது.

5. முளைகட்டிய பயிறு சீலா (Sprouted Moong Cheela)

சாதாரண பாசிப்பருப்பை விட, முளைகட்டிய பாசிப்பருப்பில் ஊட்டச்சத்துக்கள் பல மடங்கு அதிகம். முளைகட்டிய பயிர்களை லேசாக அரைத்து, சீலாக்களாகச் செய்து சாப்பிடும்போது உடலுக்குத் தேவையான ஆன்டி-ஆக்ஸிடன்ட்களும், வைட்டமின்களும் முழுமையாகக் கிடைக்கின்றன. இது செரிமானத்தை சீராக்கி, உடல் எடையைக் கட்டுக்கோப்பாக வைக்க உதவும்.

6. ரவை மற்றும் கீரை சீலா (Suji Spinach Cheela)

ரவையுடன் இரும்புச்சத்து (Iron) நிறைந்த பாலக்கீரை விழுதைச் சேர்த்து இந்த சீலா தயாரிக்கப்படுகிறது. இது பார்ப்பதற்குப் பச்சை நிறத்தில் கவர்ச்சியாக இருப்பது மட்டுமின்றி, கலோரி அளவு மிகவும் குறைந்தது. உடல் எடையைக் குறைக்கும் பயணத்தில் சுவையான மற்றும் சத்தான மாற்றத்தை விரும்புகிறவர்களுக்கு இந்த கீரை சீலா ஒரு மிகச்சிறந்த தேர்வாகும்.

டயட் டிப்ஸ்:

இந்த சீலா வகைகளைச் செய்யும்போது குறைந்த அளவே எண்ணெய் அல்லது நெய் பயன்படுத்த வேண்டும். மேலும், இவற்றை புதினா சட்னி அல்லது குறைந்த கொழுப்புள்ள தயிருடன் சேர்த்து சாப்பிடுவது இதன் பலனை இரட்டிப்பாக்கும்.