குழந்தைகளுக்கான கேம்கள் மற்றும் ஊடாடும் உள்ளடக்கங்களுடன் நெட்ஃபிக்ஸ் பிளேகிரவுண்ட் ஆப் அறிமுகம்

எட்டு வயது மற்றும் அதற்குட்பட்ட குழந்தைகளை இலக்காகக் கொண்டு நெட்ஃபிக்ஸ் பிளேகிரவுண்ட் (Netflix Playground) எனும் புதிய செயலியை நெட்ஃபிக்ஸ் திங்களன்று அறிமுகப்படுத்தியது. இது பிரபலமான தொடர்களை அடிப்படையாகக் கொண்ட ஊடாடும் அனுபவங்களுடன் (interactive experiences), குழந்தைகளுக்கேற்ற பிரத்யேக இடமாக உருவாக்கப்பட்டுள்ளது; இதன் மூலம் நிறுவனம் கேமிங் துறையில் தனது பிடியை விரிவுபடுத்துகிறது. இது அனைத்து நெட்ஃபிக்ஸ் மெம்பர்ஷிப்களிலும் சேர்க்கப்பட்டுள்ளது. மேலும், விளம்பரங்கள் மற்றும் கூடுதல் கட்டணங்கள் (in-app purchases) இல்லாத பாதுகாப்பான சூழலை இது வழங்குவதாகக் கூறப்படுகிறது. நெட்ஃபிக்ஸ் பிளேகிரவுண்ட் தற்போது தேர்ந்தெடுக்கப்பட்ட சந்தைகளில் ஐபோன் மற்றும் ஐபேட் சாதனங்களில் கிடைக்கிறது; இந்த மாத இறுதியில் இது உலகளவில் வெளியிடப்படும்.

நெட்ஃபிக்ஸ் பிளேகிரவுண்ட் அறிமுகம்

நெட்ஃபிக்ஸ் பிளேகிரவுண்ட் ஒரு தனித்துவமான செயலியாகக் கிடைக்கிறது, இதை ஏற்கனவே உள்ள நெட்ஃபிக்ஸ் கணக்கைப் பயன்படுத்தி உள்நுழைந்து அணுகலாம். இதில் பெப்பா பிக் (Peppa Pig) மற்றும்  செசேம் ஸ்ட்ரீட் (Sesame Street) போன்ற நன்கு அறியப்பட்ட தலைப்புகளின் கதாபாத்திரங்களைக் கொண்ட தேர்ந்தெடுக்கப்பட்ட கேம்கள் வழங்கப்படுகின்றன. நிறுவனத்தின் கூற்றுப்படி, அனைத்து கேம்களும் உடனடியாக விளையாடக்கூடியவை மற்றும் ஆஃப்லைனிலும் (offline) கிடைக்கின்றன.இதில் புதிர்கள் (puzzles), மெமரி கேம்கள், வண்ணம் தீட்டுதல் மற்றும் எளிய படைப்புத் திறனை வளர்க்கும் பணிகள் போன்ற பல்வேறு ஊடாடும் செயல்பாடுகள் உள்ளன. 'பிளேடைம் வித் பெப்பா பிக்', எல்மோ மற்றும் குக்கி மான்ஸ்டர் போன்ற கதாபாத்திரங்களைக் கொண்ட 'செசேம் ஸ்ட்ரீட் மினி-கேம்ஸ்' மற்றும் 'டாக்டர் சியூஸ்' (Dr Seuss) கருப்பொருள் கொண்ட சாகசங்களை இதில் பயனர்கள் அணுகலாம்.

இந்த தளம் இளைய தலைமுறைக்கு பொழுதுபோக்கு, கற்றல் மற்றும் படைப்பாற்றலை ஒருங்கிணைக்கும் வகையில் வடிவமைக்கப்பட்டுள்ளதாக நெட்ஃபிக்ஸ் கூறுகிறது.நெட்ஃபிக்ஸ் நிறுவனத்தின் அனிமேஷன் சீரிஸ் மற்றும் கிட்ஸ் & ஃபேமிலி டிவியின் துணைத் தலைவர் ஜான் டெர்டெரியன் (John Derderian) கூறுகையில், குழந்தைகள் உள்ளடக்கத்தைப் பார்ப்பதோடு மட்டுமல்லாமல், அதனுடன் தீவிரமாக ஈடுபடக்கூடிய ஒரு இடத்தை உருவாக்குவதை நிறுவனம் நோக்கமாகக் கொண்டுள்ளது என்றார். "கண்டுபிடிப்பு, கற்றல் மற்றும் விளையாடுவதற்கான ஒரு தடையற்ற இடமாக" இதை உருவாக்குவதே இலக்கு என்று அவர் மேலும் கூறினார்.

ஸ்ட்ரீமிங் தளத்தின்படி, இந்த ஆப் தற்போதுள்ள அதன் பெற்றோர் கட்டுப்பாட்டுக் கருவிகளுடன் (parental control tools) இணைத்து உருவாக்கப்பட்டுள்ளது. இதில் தனிப்பட்ட குழந்தைகளின் ப்ரொஃபைல்கள், முதிர்ச்சி வடிகட்டிகள் (maturity filters), குறிப்பிட்ட தலைப்புகளைத் தடுக்கும் வசதி மற்றும் பார்க்கும் வரலாறு (viewing history) கருவிகள் ஆகியவை அடங்கும். இந்த கருவிகள் பெற்றோர்கள் தங்கள் குழந்தைகள் இந்த கேமிங் ஆப்பில் எதை அணுகலாம் என்பதைத் தனிப்பயனாக்க அனுமதிக்கின்றன.பிளேகிரவுண்ட் மூலம், ஆப்பிள் ஆர்கேடிற்கு (Apple Arcade) ஒரு போட்டியாளராக நெட்ஃபிக்ஸ் தன்னை நிலைநிறுத்துகிறது. ஆப்பிளின் சேவையைப் போலவே, நெட்ஃபிக்ஸ் பிளேகிரவுண்டும் விளம்பரங்கள் அல்லது கூடுதல் கொள்முதல் இல்லாமல் கேம்களை வழங்குகிறது. இருப்பினும், ஒரு தனித்த கேமிங் திட்டத்தை வழங்குவதற்குப் பதிலாக, ஏற்கனவே உள்ள வீடியோ ஸ்ட்ரீமிங் சந்தாவுடன் கேம்களை இணைப்பதன் மூலம் நெட்ஃபிக்ஸ் தன்னை வேறுபடுத்திக் கொள்கிறது.

குறிப்பிடத்தக்க வகையில், நெட்ஃபிக்ஸ் முதன்முதலில் 2021-இல் மொபைல் கேம்களை அறிமுகப்படுத்தியது, ஆனால் குழந்தைகளுக்காக ஒரு பிரத்யேக கேமிங் செயலியை உருவாக்குவது இதுவே முதல் முறை. இந்த ஆப் தற்போது அமெரிக்கா, கனடா, யுகே, ஆஸ்திரேலியா, பிலிப்பைன்ஸ் மற்றும் நியூசிலாந்து ஆகிய நாடுகளில் கிடைக்கிறது; மேலும் இது ஏப்ரல் 28 அன்று உலகம் முழுவதும் வெளியிட திட்டமிடப்பட்டுள்ளது