ஐபோனிலிருந்து ஆண்ட்ராய்டுக்கு வாட்ஸ்அப் சாட்களை மாற்றுவது எப்படி? - படிப்படியான வழிகாட்டி இதோ

போன்களை மாற்றும்போது, குறிப்பாக ஐஓஎஸ் (iOS) மற்றும் ஆண்ட்ராய்டு (Android) தளங்களுக்கு இடையே மாறும்போது பல சிரமங்கள் ஏற்படுவதுண்டு. இதில் மிகப்பெரிய தலைவலி, தரவுகள் எதையும் இழக்காமல் உங்கள் வாட்ஸ்அப் கணக்கைச் சரியாக இடமாற்றம் (Migrate) செய்வதாகும். ஐஓஎஸ்-க்கான வாட்ஸ்அப்பில் இதற்கென ஒரு கருவி இருந்தாலும், சில நேரங்களில் உரையாடல்கள் அல்லது மீடியா கோப்புகள் விடுபட்டுவிடும் சிக்கல்கள் இருந்தன. இதைத் தவிர்க்க, பிற செயலிகளைப் பயன்படுத்த வேண்டியிருந்தது. ஆனால், தற்போது வாட்ஸ்அப் நிறுவனம் ஒரு இயங்குதளத்திலிருந்து மற்றொன்றுக்கு உரையாடல்கள், புகைப்படங்கள் மற்றும் வீடியோக்களை எளிதாக மாற்றும் 'சீம்லெஸ் கிராஸ் பிளாட்ஃபார்ம்' (Seamless cross-platform) வசதியை அறிவித்துள்ளது.

பயனர்கள் ஆரம்பத்திலிருந்து தொடங்க வேண்டிய அவசியமில்லாமல், தங்கள் உரையாடல்களைத் தொடர்வதை உறுதி செய்யும் வகையில் இந்த அம்சம் வடிவமைக்கப்பட்டுள்ளது. ஒரு சில படிகள் மூலம், உங்கள் முழு வாட்ஸ்அப் வரலாற்றையும் புதிய சாதனத்திற்கு மாற்றிக்கொள்ளலாம்.

வாட்ஸ்அப் கிராஸ் பிளாட்ஃபார்ம் டிரான்ஸ்பர்: இதில் என்ன கிடைக்கும்?

வாட்ஸ்அப்பின் இந்த புதிய வசதி மூலம் ஐபோனிலிருந்து ஆண்ட்ராய்டுக்கு சாட் ஹிஸ்டரி, மீடியா கோப்புகள், வாய்ஸ் நோட்ஸ், ஆவணங்கள், வாட்ஸ்அப் சேனல்கள் மற்றும் கம்யூனிட்டிகளை மாற்ற முடியும். முக்கியமான உரையாடல்கள் மற்றும் காண்டாக்ட்கள் (Contacts) அப்படியே இருக்கும் என மெட்டா நிறுவனம் தெரிவித்துள்ளது.

இந்த இடமாற்ற செயல்முறை கேபிள் (Cable) அல்லது உள்ளூர் வைஃபை (Local Wi-Fi) இணைப்பு மூலம் நேரடியாக சாதனங்களுக்கு இடையே நடக்கிறது. இதனால் உங்கள் தரவுகள் கிளவுட் சர்வர்களுக்குச் செல்லாது. மேலும், மாற்றப்படும் தரவுகளை வாட்ஸ்அப் நிறுவனத்தால் பார்க்க முடியாது. ஒருவேளை நீங்கள் ஏற்கனவே ஐக்ளவுடில் (iCloud) பேக்கப் எடுத்திருந்தால், அது தனியாக இருக்கும்.

தரவுகளின் அளவைப் பொறுத்து இந்த இடமாற்றத்திற்கு எடுக்கும் நேரம் மாறுபடும். முக்கியமான விஷயம் என்னவென்றால், புதிய ஆண்ட்ராய்டு சாதனத்தில் வாட்ஸ்அப்பை ஆக்டிவேட் செய்வதற்கு முன்பே சாட்களை மாற்ற வேண்டும். ஏற்கனவே இன்ஸ்டால் செய்திருந்தால், அதை நீக்கிவிட்டு (Uninstall) மீண்டும் இன்ஸ்டால் செய்து இந்தச் செயல்முறையைத் தொடங்க வேண்டும்.

சில கட்டுப்பாடுகள்:

பழைய சாட்களை ஆண்ட்ராய்டில் உள்ள புதிய சாட்களுடன் இணைக்க (Merge) முடியாது.

போன் எண்களை மாற்றாமல் வேறொரு எண்ணுக்கு சாட்களை மாற்ற முடியாது.

வாட்ஸ்அப் பிசினஸ் சாட்கள், ஸ்டேட்டஸ் அப்டேட்கள் மற்றும் பணப்பரிமாற்ற (Payment) செய்திகளை மாற்ற முடியாது.

ஐபோனிலிருந்து ஆண்ட்ராய்டுக்கு வாட்ஸ்அப் சாட்களை மாற்றுவது எப்படி?
உங்கள் பழைய ஐபோனிலிருந்து புதிய ஆண்ட்ராய்டு போனுக்குத் தரவுகளை மாற்ற இந்தப் படிகளைப் பின்பற்றவும்:

உங்கள் ஐபோனில் வாட்ஸ்அப்பைத் திறந்து Settings > Chats > Transfer chat history > Transfer to Android என்ற பகுதிக்குச் செல்லவும்.

ஆயத்தப் பணிகள் முடிந்ததும் Continue என்பதைக் கிளிக் செய்யவும்.

கேட்கப்பட்டால், கேமராவை அணுக Allow கொடுக்கவும். இடமாற்றம் முடியும் வரை ஐபோன் 'அன்லாக்' செய்யப்பட்டிருப்பதை உறுதி செய்யவும்.

இப்போது உங்கள் ஆண்ட்ராய்டு சாதனத்திற்குச் செல்லவும். வாட்ஸ்அப்பைத் திறந்து, ஐபோனில் பயன்படுத்திய அதே எண்ணைக் கொடுத்து சரிபார்க்கவும் (Verify).

சாதனங்கள் இணைய அனுமதி கேட்கும்போது Allow கொடுக்கவும். உங்கள் ஐபோன் கேமரா மூலம் ஆண்ட்ராய்டு திரையில் தோன்றும் QR code-ஐ ஸ்கேன் செய்யவும்.

கேட்கப்படும்போது, வைஃபை நெட்வொர்க்கில் இணைய Join என்பதைக் கிளிக் செய்து இடமாற்றத்தைத் தொடங்கவும்.

செயல்முறை முடிந்ததும், உங்கள் ஆண்ட்ராய்டு சாதனத்தில் Next என்பதைக் கிளிக் செய்து சாட்களைப் பார்க்கலாம்.

இப்போது உங்கள் புதிய ஆண்ட்ராய்டு போனில் வாட்ஸ்அப்பைப் பயன்படுத்தத் தொடங்கலாம்!