இனிப்பு ஆசையா? பேரிச்சம்பழத்தில் நார்ச்சத்துள்ள 'ரீசஸ் கப்ஸ்' செய்யும் எளிய மருத்துவக் குறிப்பு!

இரவு உணவிற்குப் பிறகு இனிப்பு சாப்பிட வேண்டும் என்ற ஆர்வம் பலருக்கும் ஏற்படுவது வழக்கம். பெரும்பாலும் இந்த ஆசை நம்மை கடைகளில் விற்கப்படும் பதப்படுத்தப்பட்ட (ultraprocessed) சாக்லேட்டுகள் மற்றும் மிட்டாய்களை நோக்கி அழைத்துச் செல்கிறது. ஆனால், நமது ஆரோக்கியத்தைக் கெடுக்காமல், அதே சமயம் நாவிற்கு இனிப்பான சுவையைத் தரும் ஆரோக்கியமான பலகாரங்களை வீட்டிலேயே தயாரிக்க முடியும் என்று மருத்துவர்கள் கூறுகின்றனர்.

அமெரிக்காவின் புளோரிடாவைச் சேர்ந்த பிரபல இரைப்பை குடல் மருத்துவ நிபுணரும் (Gastroenterologist), ஹெல்த் கன்டென்ட் கிரியேட்டருமான டாக்டர் ஜோசப் சல்ஹாப், வெறும் மூன்றே பொருட்களைக் கொண்டு உடலுக்கு நன்மை பயக்கும் 'ரீசஸ் கப்ஸ்' (Reese's cups) போன்ற சுவையான இனிப்பை வீட்டிலேயே தயாரிக்கும் முறையைப் பகிர்ந்துள்ளார். வழக்கமான சர்க்கரை மற்றும் மிட்டாய்களுக்குப் பதிலாக பேரிச்சம்பழத்தைப் பயன்படுத்தி இந்த ஆரோக்கியமான இனிப்பை அவர் உருவாக்கியுள்ளார்.

தயாரிக்கும் முறை மிகவும் எளிது

இந்த சாக்லேட் கப்ஸ் செய்ய ஒரு மெட்ஜூல் (Medjool) பேரிச்சம்பழத்தை நீளவாக்கில் வெட்டி அதன் விதையை நீக்க வேண்டும். பின்னர் அதன் நடுவில் உள்ள இடைவெளியில் 2 தேக்கரண்டி உங்களுக்குப் பிடித்த வேர்க்கடலை வெண்ணெய் (Peanut butter) அல்லது நட்ஸ் வெண்ணெயை நிரப்ப வேண்டும். அதன் மேல் உருகிய 70% டார்க் சாக்லேட்டை ஊற்றி, சிறிதளவு கடல் உப்பு (sea salt) தூவ வேண்டும். இதனை 15 முதல் 20 நிமிடங்கள் (விருப்பப்பட்டால் 2 மணிநேரம் வரை) குளிர்சாதனப் பெட்டியில் வைத்தால் சுவையான ஆரோக்கிய இனிப்பு தயார்.

செரிமானத்தையும் குடல் ஆரோக்கியத்தையும் மேம்படுத்தும்

டாக்டர் சல்ஹாப் அவர்களின் கூற்றுப்படி, பேரிச்சம்பழத்தில் உள்ள இயற்கையான நார்ச்சத்து செரிமானத்தை சீராக்குவதோடு குடல் ஆரோக்கியத்தையும் மேம்படுத்துகிறது. மேலும், இது வயிற்றை நிரம்பிய உணர்வுடன் வைத்திருக்க உதவுகிறது. பேரிச்சம்பழத்தில் இயற்கையான இனிப்பு சுவையுடன், ஆன்டி-ஆக்ஸிடன்ட் பண்புகளைக் கொண்ட பாலிஃபினால்கள் (polyphenols) எனப்படும் தாவரக் சேர்மங்களும் நிறைந்துள்ளன.

இதயத்திற்கும் உடலுக்கும் தரும் நன்மைகள்

இந்த ரெசிபியில் சேர்க்கப்படும் வேர்க்கடலை வெண்ணெய் உடலுக்குத் தேவையான ஆரோக்கியமான கொழுப்புகளை வழங்குகிறது. அதேபோல், 70 சதவீதம் கொண்ட டார்க் சாக்லேட் வெறும் சுவையைத் தருவது மட்டுமின்றி, இதயம் மற்றும் இரத்த நாளங்களின் ஆரோக்கியத்தை ஆதரிக்கும் ஆன்டி-ஆக்ஸிடன்ட்டுகளைக் கொண்டுள்ளது. இது குடலில் உள்ள நல்ல பாக்டீரியாக்களின் (gut microbiome) வளர்ச்சிக்கும் நன்மை பயக்கிறது.

"பேரிச்சம்பழத்தின் நார்ச்சத்து, நட்ஸ் வெண்ணெயின் ஆரோக்கியமான கொழுப்பு மற்றும் டார்க் சாக்லேட்டின் ஆன்டி-ஆக்ஸிடன்ட்டுகள் ஆகியவை இணைந்து இந்த எளிய இனிப்பை ஊட்டச்சத்துக்கள் நிறைந்ததாக மாற்றுகின்றன" என்று டாக்டர் சல்ஹாப் விளக்கியுள்ளார். அடுப்பில் வைத்து பேக்கிங் செய்யத் தேவையில்லாத, நார்ச்சத்தும் ஆன்டி-ஆக்ஸிடன்ட்டும் நிறைந்த இந்த இனிப்பு, கடைகளில் வாங்கும் ரீசஸ் கப்ஸ் போலவே சுவையாக இருக்கும் என அவர் உறுதியளித்துள்ளார்.