தாய்லாந்தின் NBTC சான்றிதழ் தளத்தில் சியோமி 17T ப்ரோ: விரைவில் சர்வதேச அளவில் அறிமுகம்

சியோமி 15T ப்ரோ (Xiaomi 15T Pro) மற்றும் சியோமி 15T ஆகியவற்றை உள்ளடக்கிய சியோமி 15T தொடர், கடந்த ஆண்டு செப்டம்பர் மாதம் உலகளவில் அறிமுகப்படுத்தப்பட்டது. தற்போது, இந்தத் தொடரின் அடுத்த தலைமுறை மாடல்களை வெளியிடுவதற்கு சீன ஸ்மார்ட்போன் தயாரிப்பு நிறுவனமான சியோமி தயாராகி வருவதாகத் தெரிகிறது. சியோமி 17T ப்ரோ மற்றும் சியோமி 17T என்று பெயரிடப்பட்டுள்ள இந்த இரண்டு கைபேசிகளும் ஏற்கனவே பல சான்றிதழ் இணையதளங்களில் காணப்பட்டுள்ளன.தற்போது, சியோமி 17T ப்ரோ மாடல் தாய்லாந்தின் சான்றிதழ் தரவுத்தளத்தில் பட்டியலிடப்பட்டுள்ளதாகத் தகவல்கள் தெரிவிக்கின்றன. இது இந்த ஸ்மார்ட்போன் விரைவில் தேர்ந்தெடுக்கப்பட்ட உலகளாவிய சந்தைகளில் அறிமுகப்படுத்தப்படலாம் என்பதை உணர்த்துகிறது. முன்னதாக, இதன் அடிப்படை மாடலான சியோமி 17T, சிங்கப்பூரின் சான்றிதழ் இணையதளத்தில் காணப்பட்டதைத் தொடர்ந்து இந்த புதிய தகவல் வெளியாகியுள்ளது. இது தொழில்நுட்ப ஆர்வலர்களிடையே பெரும் எதிர்பார்ப்பை ஏற்படுத்தியுள்ளது.

தாய்லாந்து NBTC தளத்தில் சியோமி 17T (மாடல் எண்: 2602EPTC0G)

எக்ஸ் (X) தள பயனர் 'Gadget Listings' கூற்றுப்படி, சியோமி 17T மாடல் தாய்லாந்தின் NBTC சான்றிதழைப் பெற்றுள்ளது. இது அந்த நாட்டில் போனை விற்பனைக்குக் கொண்டுவருவதற்கான வழியைத் தெளிவுபடுத்தியுள்ளது. இந்த கைபேசி  2602EPTC0G என்ற மாடல் எண்ணுடன் பட்டியலிடப்பட்டுள்ளது. எனினும், இதன் துல்லியமான வெளியீட்டுத் தேதி, சிறப்பம்சங்கள், வடிவமைப்பு மற்றும் விலை குறித்த மற்ற விவரங்கள் இன்னும் ரகசியமாகவே உள்ளன. இவை வரும் வாரங்களில் வெளிவரும் என்று எதிர்பார்க்கப்படுகிறது.

இதற்கு ஒரு வாரத்திற்கு முன்பு, சிங்கப்பூரின்  IMDA தரவுத்தளத்தில் சியோமி 17T மாடல் (2602DPT53G) காணப்பட்டது. அந்தப் பட்டியலில் இந்த போன் புளூடூத், வைஃபை (Wi-Fi) மற்றும் NFC இணைப்புகளைக் கொண்டிருக்கும் என்பது தெரியவந்தது. முன்னதாக, சியோமி 17T மற்றும் 17T ப்ரோ ஆகிய இரண்டும்  IMEI தரவுத்தளத்திலும் முறையே 2602EPTC0G மற்றும் 2602EPTC0R ஆகிய மாடல் எண்களுடன் பதிவாகியிருந்தன.

எதிர்பார்க்கப்படும் சிறப்பம்சங்கள்

சமீபத்திய தகவல்களின்படி, சியோமி 17T ப்ரோ மாடலில் முதன்மையான  3nm ஆக்டா கோர் மீடியாடெக் டைமென்சிட்டி 9500 (MediaTek Dimensity 9500)  சிப்செட் பொருத்தப்பட்டிருக்கும். மேலும், இது தூசி மற்றும் நீர் புகாத வண்ணம்  IP68 + IP69 தரச் சான்றிதழைப் பெற்றிருக்கலாம். முக்கியமாக, இதில்  8,500mAh மிகப்பெரிய பேட்டரி மற்றும் 100W வேகமான சார்ஜிங் வசதி இடம்பெற வாய்ப்புள்ளது. பாதுகாப்பிற்காக 3D அல்ட்ராசோனிக் கைரேகை சென்சார் இதில் இருக்கலாம் என்றும் கூறப்படுகிறது.

இந்த போன், செப்டம்பர் 2025-இல் அறிமுகமான சியோமி 15T ப்ரோவின் தொடர்ச்சியாக வெளிவருகிறது. சியோமி 15T ப்ரோ (12GB + 256GB) சர்வதேச சந்தையில் 649 ஜிபிபி (சுமார் ₹77,000) விலையில் அறிமுகமானது. அந்த மாடல் டைமென்சிட்டி 9400+ சிப்செட் மற்றும் 5,500mAh பேட்டரியைக் கொண்டிருந்தது என்பது குறிப்பிடத்தக்கது.