20 மெகாபிக்சல் பாப்-அப் செல்பி கேமரா: வெளியானது 'ரெட்மீ K20, K20 Pro' பிரீமியம் போன்கள்!

பல டீசர்கள், பல அறிவிப்புகள், பல தகவல் கசிவுகளை கடந்து, இன்று அறிமுகமானது 'ரெட்மீ K20'. இந்த ஸ்மார்ட்போன் தன்னுடன் 'ரெட்மீ K20 Pro'-வையும் அழைத்து வந்துள்ளது. சியோமியின் துணை நிறுவனமான ரெட்மீ, மே 28-ஆம் தேதியான இன்று, பெய்ஜிங்கில் நடந்த அறிமுக நிகழ்வில் இந்த ஸ்மார்ட்போன்கள் பற்றி தகவல்களை வெளியிட்டது. தொடர்ச்சியாக பட்ஜெட் ஸ்மார்ட்போன்களை அறிமுகப்ப்டுத்தி வந்த இந்த நிறுவனத்தின், புதிய பிரீமியம் ஸ்மார்ட்போன்கள் தான் இந்த ரெட்மீ K20, மற்றும் ரெட்மீ K20 Pro. முன்னதாக இந்த நிறுவனம், இந்த ஆண்டில் மட்டும் ரெட்மீ நோட் 7 தொடரில் மூன்று பட்ஜெட் ஸ்மார்ட்போன்களை அறிமுகப்படுத்தியுள்ளது என்பதும், அவை 1 கோடிக்கு மேல் விற்பனை எண்ணிக்கையை கடந்துள்ளது என்பது குறிப்பிடத்தக்கது. 

இந்த இரண்டு ஸ்மார்ட்போன்களுடன் இணைந்து, தனது முதல் லேப்டாப்பான 'ரெட்மீபுக் 14' லேப்டாப்பையும் அறிமுகப்படுத்தியுள்ளது, ரெட்மீ நிறுவனம். 

ரெட்மீ K20 மற்றும் ரெட்மீ K20 Pro: விலை

நான்கு வகைகளில் அறிமுகமாகியுள்ள ரெட்மீ K20 Pro ஸ்மார்ட்போனில்,  6GB RAM + 64GB சேமிப்பு அளவில் வெளியாகும் வகையின் விலை, 2,499 யுவான்கள் (25,200 ரூபாய்). 6GB RAM + 128GB சேமிப்பு அளவு, 8GB RAM + 128GB சேமிப்பு அளவு மற்றும் 8GB RAM + 256GB சேமிப்பு அளவு என மேலும் மூன்று வகைகளில் வெளியாகியுள்ள இந்த ஸ்மார்ட்போன், அதன் விலைகளை 2,599 யுவான்கள்(26,200 ரூபாய்), 2,799 யுவான்கள் (28,200 ரூபாய்) மற்றும் 2,999 யுவான்கள் (30,200 ரூபாய்) என கொண்டுள்ளது.

இதனுடன் வெளியாகியுள்ள மற்றொரு ஸ்மார்ட்போனான ரெட்மீ K20 6GB RAM + 64GB சேமிப்பு அளவு மற்றும் 6GB RAM + 128GB சேமிப்பு அளவு என இரண்டு வகைகளில் மட்டுமே வெளியாகியுள்ளது. இவற்றின் விலை 1,999 யுவான்கள் (20,200 ரூபாய்) மற்றும் 2,099 யுவான்கள் (21,200 ரூபாய்).

ரெட்மீ K20 Pro நீலம் (Glacier Blue), சிவப்பு (Flame Red), மற்றும் கருப்பு (Carbon Fiber Black) என மூன்று வண்ணங்களில் வெளியாகவுள்ளது. அதே நேரம், ரெட்மீ K20 நீலம் (Glacier Blue) மற்றும் சிவப்பு (Flame Red) என இரு வண்ணங்களில் வெளியாகவுள்ளது.

சீனாவில், 'ரெட்மீ K20 Pro'-வின் முதல் விற்பனை ஜூன் 1-ஆம் தேதியன்று துவங்கவுள்ளது. அதனை தொடர்ந்து ஜூன் 6-ஆம் தேதியன்று ரெட்மீ K20-யின் விற்பனை நடக்கும் என தெரிவித்துள்ளது ரெட்மீ நிறுவனம். இதன் இந்திய அறிமுகம் குறித்து இன்னும் எந்த தகவலும் அறிவிக்கப்படவில்லை.

ரெட்மீ K20 மற்றும் ரெட்மீ K20 Pro: சிறப்பம்சங்கள்!

இரண்டு நானோ சிம் வசதி கொண்ட இந்த ஸ்மார்ட்போன் அண்ட்ராய்ட் 9 பை அமைப்பு கொண்டுள்ளது. 6.39 இன்ச் FHD+ திரை(1080x2340 பிக்சல்கள்), 19.5:9 திரை விகிதம், 91.9 சதவிகித திரை-உடல் விகிதம் என அட்டகாசமான திரை அம்சங்களை கொண்டுள்ள இந்த ஸ்மார்ட்போனில் இன்-டிஸ்ப்லே ஃபிங்கர்பிரிண்ட் சென்சார் பொருத்தப்பட்டுள்ளது.

48 மெகாபிக்சல் அளவிலான முதன்மை கேமரா கொண்டுள்ள இந்த ஸ்மார்ட்போனில் மொத்தம் 3 பின்புற கேமராக்கள் உள்ளது என அறிவித்துள்ள சியோமி நிறுவனம், 13 மெகா பிக்சல் வைட்-ஆங்கிள் கேமரா மற்றும் 8 மெகாபிக்சல் அளவிலான மற்றொரு கேமராவை கொண்டிருக்கும் என அறிவித்துள்ளது. இதன் முன்புற கேமரா, 20 மெகாபிக்சல் அளவிலான பாப்-அப் கேமரா என்பது குறிப்பிடத்தக்கது.

2 நாட்கள் பேட்டரி பேக்-அப் என்ற உறுதியை அளித்துள்ள சியோமி நிறுவனம், இந்த ஸ்மார்ட்பொனில் 4000mAh பேட்டரியை பொருத்தியுள்ளது எனவும் கூறப்படுகிறது. மேலும், 27W அதிவேக சார்ஜர் இதனுடன் வரலாம் எனவும் எதிர்பார்க்கப்படுகிறது. மேலும் மற்ற ஸ்மார்ட்போன்கள் போன்றே 4G வசதி மற்றும் ப்ளூடூத் v5, வை-பை வசதிகளை கொண்டுள்ளது இந்த ஸ்மார்ட்போன்.

அனைத்து அம்சங்களிலும் ரெட்மீ K20 Pro-வை போன்றே அமைந்துள்ள ரெட்மீ K20, ப்ராசஸர் செயல்பாட்டில் மட்டும் சற்று வேறுபட்டுள்ளது. இந்த ஸ்மார்ட்போனில் ஸ்னேப்ட்ராகன் 730 எஸ் ஓ சி ப்ராசஸர் பொருத்தப்பட்டுள்ளது. மேலும், 27W சார்ஜருக்கு பதில் 18W சார்ஜர் வழங்கப்படவுள்ளது. மற்றபடி ரெட்மீ K20-யும் ரெட்மீ K20 Pro-வும் ஒன்று தான்.