சாம்சங் கேலக்ஸி வாட்ச் மயக்கம் வருவதை ஐந்து நிமிடங்களுக்கு முன்பே கணிக்கக்கூடும்: ஆய்வு முடிவுகள் தகவல்

அணியக்கூடிய சாதனங்கள் (wearable devices) மயக்கம் ஏற்படும் நிகழ்வுகளை அவை நடப்பதற்கு முன்பே எப்படிக் கண்டறிய உதவும் என்பதைக் காட்டும் புதிய மருத்துவ ஆய்வு முடிவுகளை சாம்சங் பகிர்ந்துள்ளது. தென் கொரியாவின் சுங்-ஆங் பல்கலைக்கழக குவாங்மியோங் மருத்துவமனையுடன் இணைந்து இந்த ஆய்வு நடத்தப்பட்டது. இதயத் துடிப்பு மற்றும் இரத்த அழுத்தம் திடீரென குறைவதால் ஏற்படும் 'வாசோவகல் சிங்கோப்' (vasovagal syncope) எனும் பொதுவான பாதிப்பு குறித்து இந்த ஆராய்ச்சி கவனம் செலுத்தியது. இந்த கண்டுபிடிப்புகள் 'European Heart Journal Digital Health' இதழில் வெளியிடப்பட்டதாக சாம்சங் தெரிவித்துள்ளது. வணிக ரீதியான ஸ்மார்ட்வாட்சைப் பயன்படுத்தி மயக்கத்தைக் கணிப்பதை நிரூபித்த முதல் வெற்றிகரமான ஆய்வு இது என்றும் நிறுவனம் கூறியுள்ளது. இருப்பினும், இந்த வசதி பயனர்களுக்கு எப்போது கிடைக்கும் என்பதை சாம்சங் இன்னும் உறுதிப்படுத்தவில்லை.

வாசோவகல் சிங்கோப் குறித்த சாம்சங்கின் ஆராய்ச்சி

இந்த மருத்துவ பரிசோதனையின் போது உயிரியல் சமிக்ஞை (biosignal) தரவுகளைச் சேகரிக்க கேலக்ஸி வாட்ச் 6 பயன்படுத்தப்பட்டதாக சாம்சங் கூறுகிறது. மற்ற கேலக்ஸி வாட்ச் மாடல்களுக்கான ஆதரவை சாம்சங் இன்னும் அதிகாரப்பூர்வமாக உறுதிப்படுத்தவில்லை. இருப்பினும், பிபிஜி (PPG) சென்சார்கள் மற்றும் இதயத் துடிப்பு மாறுபாடு கண்காணிப்பு வசதி கொண்ட புதிய கேலக்ஸி வாட்ச் சாதனங்கள் எதிர்காலத்தில் இந்த வசதியை ஆதரிக்கக்கூடும்.

வாசோவகல் சிங்கோப் அறிகுறிகள் இருப்பதாக சந்தேகிக்கப்படும் 132 நோயாளிகள் இந்த ஆய்வில் பங்கேற்றனர். மருத்துவ மேற்பார்வையின் கீழ் அவர்களுக்கு மயக்கம் வரவழைக்கப்பட்டு மதிப்பீடுகள் செய்யப்பட்டன. சோதனைகள் முழுவதும் இதயத் துடிப்பு மாறுபாடு தரவுகளைக் கண்காணிக்கும் பிபிஜி சென்சார் கொண்ட கேலக்ஸி வாட்ச் 6-ஐ பங்கேற்பாளர்கள் அணிந்திருந்ததாக நிறுவனம் தெரிவித்துள்ளது.சேகரிக்கப்பட்ட தரவுகளை ஆராய்ச்சியாளர்கள் ஏஐ (AI) அடிப்படையிலான கணிப்பு மாதிரியைப் பயன்படுத்தி ஆய்வு செய்தனர். இந்த அமைப்பு ஒருவருக்கு மயக்கம் வருவதற்கு ஐந்து நிமிடங்களுக்கு முன்பே எச்சரிக்கை அறிகுறிகளைக் கண்டறிந்ததாகவும், இதன் ஒட்டுமொத்த துல்லியம் 84.6 சதவீதம் என்றும் சாம்சங் கூறியுள்ளது. இந்த மாதிரி 90 சதவீத உணர்திறன் (sensitivity) மற்றும் 64 சதவீத தனித்துவத்தைப் (specificity) பதிவு செய்துள்ளது.

மன அழுத்தம், வலி, பயம் அல்லது உணர்ச்சி ரீதியான பாதிப்புகள் போன்ற காரணிகளால் வாசோவகல் சிங்கோப் தூண்டப்படலாம் என்று சாம்சங் விளக்கியுள்ளது. இந்த நிலை உயிருக்கு ஆபத்தானது அல்ல என்றாலும், மயக்கத்தால் திடீரென கீழே விழுவது எலும்பு முறிவு, மூளையதிர்ச்சி அல்லது தலைக் காயம் போன்ற பாதிப்புகளுக்கு வழிவகுக்கும்.

சுங்-ஆங் பல்கலைக்கழக குவாங்மியோங் மருத்துவமனையின் பேராசிரியர் ஜுன்ஹ்வான் சோ கூறுகையில், முன்கூட்டியே எச்சரிக்கும் இந்த அமைப்பு, நோயாளி கீழே விழுவதற்கு முன்பு அமர்வதற்கோ, பாதுகாப்பான இடத்திற்குச் செல்வதற்கோ அல்லது உதவிக்கு அழைப்பதற்கோ போதுமான நேரத்தை வழங்கும் என்றார். மருத்துவ நிறுவனங்களுடனான ஒத்துழைப்பு மற்றும் கூடுதல் தடுப்பு சுகாதார ஆய்வுகள் மூலம் தனது அணியக்கூடிய சாதனங்களில் சுகாதாரக் கண்காணிப்பு ஆராய்ச்சியைத் தொடர்ந்து விரிவாக்கத் திட்டமிட்டுள்ளதாகவும் சாம்சங் தெரிவித்துள்ளது.