கொரிய சுற்றுலாவின் கௌரவ தூதராக நியமிக்கப்பட்டார் பிரியங்கா மோகன்: "இது எனக்கு மிகவும் ஸ்பெஷல்" என நெகிழ்ச்சி!

தென்னிந்தியத் திரையுலகின் முன்னணி நடிகையான பிரியங்கா மோகன், கொரியா சுற்றுலா அமைப்பால் (KTO) கொரிய சுற்றுலாவின் கௌரவத் தூதராக (Honorary Ambassador) அதிகாரப்பூர்வமாக நியமிக்கப்பட்டுள்ளார். இந்தத் தகவலைத் தனது சமூக வலைத்தளப் பக்கத்தில் மகிழ்ச்சியுடன் பகிர்ந்துள்ள அவர், இந்த அங்கீகாரம் தனக்குக் கிடைத்ததில் பெரும் பெருமிதம் கொள்வதாகத் தெரிவித்துள்ளார். இந்திய ரசிகர்களிடையே கொரியக் கலாச்சாரத்தையும் சுற்றுலாவையும் மேம்படுத்தும் நோக்கில் கொரியா சுற்றுலா அமைப்பு இதுபோன்ற பிரபலங்களை நியமித்து வருகிறது.

'மேட் இன் கொரியா' தந்த மகுடம்

நெட்பிளிக்ஸ் ஓடிடி தளத்தில் வெளியான 'மேட் இன் கொரியா' திரைப்படத்தில் பிரியங்கா மோகன் முதன்மைக் கதாபாத்திரத்தில் நடித்திருந்தார். கொரியாவில் மாட்டிக்கொள்ளும் ஒரு இந்தியப் பெண்ணைச் சுற்றி நகரும் இக்கதை, இந்திய ரசிகர்களிடையே கொரியக் கலாச்சாரம் மற்றும் அதன் அழகிய இடங்கள் குறித்த பெரும் ஈர்ப்பை ஏற்படுத்தியது. இப்படம் கொடுத்த மிகப்பெரிய சர்வதேச வெற்றியே, அவருக்கு இந்த கௌரவப் பதவி கிடைக்க முக்கியக் காரணமாக அமைந்துள்ளது.

இந்த கௌரவத் தூதர் நியமனம் குறித்து தனது இன்ஸ்டாகிராம் பக்கத்தில் நெகிழ்ச்சியுடன் பதிவிட்டுள்ள பிரியங்கா மோகன், கொரிய சுற்றுலாவின் கௌரவத் தூதராக நியமிக்கப்பட்டிருப்பது தனக்கு மிகவும் ஸ்பெஷலானது என்று குறிப்பிட்டுள்ளார். மேலும், கொரியக் கலாச்சாரத்தை இந்திய ரசிகர்களிடம் கொண்டு சேர்க்கும் ஒரு பாலமாக என்னை அங்கீகரித்த கொரிய அரசுக்கும், கொரியா சுற்றுலா அமைப்பிற்கும் தனது மனமார்ந்த நன்றிகளையும் அவர் தெரிவித்துக் கொண்டுள்ளார்.

அரசு விருந்தும் அடுத்தடுத்த படங்களும்

பிரியங்கா மோகனுக்கும் தென்கொரியாவிற்குமான நட்பு சமீபகாலமாகவே வலுவடைந்து வருகிறது. முன்னதாக, தென்கொரிய அதிபர் லீ ஜே மியுங் இந்தியாவிற்கு வருகை தந்திருந்தபோது, புது தில்லியில் உள்ள குடியரசுத் தலைவர் மாளிகையில் அவருக்கு அளிக்கப்பட்ட அதிகாரப்பூர்வ அரசு விருந்தில் கலந்துகொள்ள பிரியங்கா மோகனுக்கும் சிறப்பு அழைப்பு விடுக்கப்பட்டது குறிப்பிடத்தக்கது. இதற்கு முன்பு பிரபல இந்திய நட்சத்திரங்களான ஹினா கான் மற்றும் அனுஷ்கா சென் ஆகியோர் இந்த கௌரவத் தூதர் பொறுப்பை வகித்துள்ளனர்.

தற்போது பிரியங்கா மோகன் தமிழில் மிகவும் பிஸியான நடிகையாக வலம் வருகிறார். மாரி செல்வராஜ் இயக்கத்தில் இளையராஜா இசையமைக்கும் 'மஞ்சணத்தி' படத்தில் நடித்து வரும் அவர், இதுதவிர வெற்றிமாறனின் தயாரிப்பில் உருவாகும் 'அரசன்', மற்றும் '666 ஆபரேஷன் ட்ரீம் தியேட்டர்' ஆகிய படங்களிலும் அடுத்தடுத்து நடித்து வருகிறார்.