ஆண்ட்ராய்டு 17: புதிய லாக் ஸ்கிரீன் பாதுகாப்பு வசதியுடன் பின் (PIN) எண்ணைத் தவறாக யூகிக்கும் ஆபத்து குறைப்பு!

ஆண்ட்ராய்டு 17-ல், பின் (PIN) மற்றும் கடவுச்சொற்களைத் தவறாக யூகித்துத் திறக்கும் தாக்குதல்களைத் தடுக்க கூகுள் வலுவான லாக் ஸ்கிரீன் பாதுகாப்புகளை அறிமுகப்படுத்துகிறது. இந்த அப்டேட், தவறான முயற்சிகளுக்கான வரம்பைக் கடுமையாக்குவதோடு, முறையான பயனர்களுக்கான பாதுகாப்பு அம்சங்களையும் மேம்படுத்துகிறது. மேலும், லாக் அவுட் ஆன பிறகு போனை மீட்கும் முறையை எளிதாக்குகிறது. இது அன்றாடப் பயன்பாட்டில் எந்தப் பாதிப்பும் இன்றி, ஆண்ட்ராய்டு சாதனங்களின் பாதுகாப்பை உறுதி செய்கிறது. லாக் அவுட் குறித்த தகவல்கள் காட்டப்படும் விதமும் மேம்படுத்தப்பட்டு, கணக்கை மீட்கும் வசதிகள் எளிமையாக்கப்பட்டுள்ளன.

ஆண்ட்ராய்டு 17-ல் புதிய பின் (PIN) விதிகள் மூலம் பாதுகாப்பை பலப்படுத்தும் கூகுள்

ஆண்ட்ராய்டின் சமூக ஈடுபாட்டு மேலாளர் மிஷால் ரஹ்மான் எக்ஸ் (X) தளத்தில் பதிவிட்டதாவது, ஆண்ட்ராய்டு 17-ல், பின் மற்றும் கடவுச்சொற்களைத் தவறாக உள்ளிடுவதற்கான அனுமதிக்கப்பட்ட முயற்சிகள் குறைக்கப்பட்டு, அடுத்தடுத்த லாக் அவுட் காலங்கள் நீட்டிக்கப்பட்டுள்ளன. புதிய அமைப்பின்படி, முதல் ஒரு நிமிடத்தில் 6 தவறான முயற்சிகள், 6 நிமிடங்களில் 7, 25 நிமிடங்களில் 8, 24 மணிநேரத்தில் 12 மற்றும் 5 ஆண்டுகளில் 19 முயற்சிகள் மட்டுமே அனுமதிக்கப்படும். முன்னதாக இருந்த ஆண்ட்ராய்டு பதிப்புகளில், இதே காலக்கட்டத்தில் முறையே 10, 20, 50, 110 மற்றும் 1,800 முயற்சிகள் அனுமதிக்கப்பட்டிருந்தன.

தொடர்ந்து 20 முறை தவறான பின் அல்லது கடவுச்சொல் உள்ளிடப்பட்டால், அடுத்தகட்ட முயற்சிகள் முற்றிலும் தடுக்கப்படும். இந்த வரம்பு, அடிக்கடி பயன்படுத்தப்படும் கடவுச்சொற்களைத் தொடர்ந்து யூகித்துத் திறக்கும் தாக்குதல்களைப் பெருமளவு குறைக்கிறது.அதே தவறான பின் எண்ணை மீண்டும் மீண்டும் உள்ளிடுபவர்களுக்காக, 'டூப்ளிகேட்-கெஸ்' (duplicate-guess) கண்டறியும் வசதியையும் கூகுள் சேர்த்துள்ளது. ஒரே தவறான தகவலை மீண்டும் உள்ளிடும்போது, அது தனித்தனித் தவறான முயற்சியாகக் கருதப்படாது. அதற்குப் பதிலாக, கணினி அந்தப் பதிவை அடையாளம் கண்டு, அது ஏன் கணக்கில் எடுத்துக்கொள்ளப்படவில்லை என்பதற்கான விளக்கத்தைக் காட்டும்.

லாக் அவுட் டைமர்கள் காட்டப்படும் விதத்திலும் ஆண்ட்ராய்டு 17 மாற்றங்களைச் செய்துள்ளது. வினாடிகளில் காட்டப்படுவதற்குப் பதிலாக, லாக் ஸ்கிரீனில் எளிதாகப் புரியும் வகையில் நிமிடங்கள் அல்லது பிற கால அளவுகளில் செய்திகள் காட்டப்படும். உதாரணமாக, 1,800 வினாடிகள் என்று காட்டுவதற்குப் பதிலாக, "30 நிமிடங்களுக்குப் பிறகு மீண்டும் முயற்சிக்கவும்" என்று காட்டும்.லாக் ஸ்கிரீனில் கணக்கை மீட்பதற்கான குறுக்குவழியையும் கூகுள் சேர்த்துள்ளது. இந்த லிங்க், போனைத் திறக்க முடியாத பயனர்கள், மற்றொரு சாதனத்தைப் பயன்படுத்தித் தங்கள் கணக்கை மீட்பதற்கான வழிகாட்டுதலுக்கு அழைத்துச் செல்லும்.

இந்த மேம்படுத்தப்பட்ட லாக் ஸ்கிரீன் பாதுகாப்புகளை, மே மாதம் நடைபெற்ற 'தி ஆண்ட்ராய்டு ஷோ: ஐ/ஓ எடிஷன்' (The Android Show: I/O Edition) நிகழ்வில் கூகுள் முதன்முதலில் அறிவித்தது. இது ஆண்ட்ராய்டு 16 QPR2-ல் அறிமுகப்படுத்தப்பட்ட பாதுகாப்பு மாற்றங்களின் தொடர்ச்சியாகும். முறையான பயனர்கள் எளிதாகத் தங்கள் சாதனத்தை மீண்டும் அணுகவும், அதே நேரத்தில் தவறான வழிகளில் ஊடுருவுபவர்களைத் தடுக்கவும் இந்த புதிய கொள்கை உருவாக்கப்பட்டுள்ளது.